Psa 87 | XSI | STEP | Muŋgani, Yova Kindeni iveta tamwata ne lawea ŋalae imandi ne tuu sapâŋa kulu.

Psalms 87

Kinzi sindeka ŋana Jerusalem lawea kâ, i ŋa toŋge tu Saion lawea

Kinzi Kora ne vâsa ŋgu sisia wâŋgiŋa ŋine

1 Muŋgani, Yova Kindeni iveta tamwata ne lawea ŋalae imandi ne tuu sapâŋa kulu. 2 Lawea rârâ nde keno Isrel nenda tâno. Andeta Yova Kindeni ilo ndo ikeno pa Saion lawea, aku i ne morâŋa tu lawea ŋinde ipole lawea pinde rârâni. 3 Mine kala miki tamâta ŋine kamo Maro Kindeni ne lawea, miki kaloŋo ŋga! Maro Kindeni uru iporo ŋgua arara nâ ŋana miki kâ. 4 Iporo mine tu, “Kinzi tinikoa ŋgu rârâni ma muli sipaveta kuku naneŋgu ŋgua. Naŋa aporo ŋananzi tinikoa ŋgu ŋinde simo Isip tâno wa Babilon lawea wa Filistia lawea wa Tanis lawea wa Itopia tâno wa. Kinzi ŋinde ma sipâŋga sitogo Saion lawea warakanzi mine, ŋana tu kinzi ma siwâŋgi pa naŋa.”

5 Mao nâ, lâ zo ŋinde Maro Kindeni ma itula Saion lawea kilala pwataki mine tu, “Ŋine nde tamâta rârâni nenzi lawea tina mao.” Yova Kindeni âta Tamwata, i tamwata ma iveta Saion lawea ipâŋga kaika ndo, ku ma ikai maro panzi tamâta rârâni. 6 Yova Kindeni ma iŋgere kinzi tamâta pa ŋgu ndoni ŋanzi lâ pepa tini, aku ma iseŋge ŋanzi ŋinde ilâ taitu kuku Saion lawea laluna ŋanzi. 7 Aku kinzi tamâta ŋinde ma siwâŋgi ku sindeka nâ. Kinzi ma siporo mine tu, “O Saion, maka nema lawea tina mao kala nokoni.”